Imetumwa : January 24th, 2025
Afisa Mwandikishaji wa Wilaya ya Nachingwea, Mhandisi Chionda Kawawa, amewataka viongozi wa dini Waislam na Wakristo kutoa ushirikiano, kuhamasisha na kutoa elimu kwa wananchi ili washiriki kwenye zoezi la uboreshaji wa daftari la kudumu la wapiga kura. Hayo maeyazungumza leo, Januari 24,2025 kwenye kikao na viongozi wa dini wa madhehebu ya wakilisto na Waislamu mbalimbali wilayani humo, Kawawa amesisitiza kuwa viongozi hao ni muhimu kwa kuwa hutumika kuelimisha jamii na kubadilisha mtindo wa maisha.
Aliongeza kuwa ni muhimu wananchi wajitokeze kwa wingi kwenye zoezi hilo kwani kadi ya kupigia kura ina umuhimu mkubwa baada ya uchaguzi, kwani inaweza kutumika kama kitambulisho cha taifa.
Zoezi la uandikishaji wa wapiga kura linatarajiwa kuanza rasmi Januari 28 hadi Februari 3, 2025, likihusisha kuboresha taarifa za awali za wapiga kura, kuandikisha wapiga kura wapya, kutoa kadi mpya kwa wapiga kura, kuhamisha taarifa za wapiga kura waliohama makazi, na kuondoa taarifa za wapiga kura waliopoteza sifa.
Afisa Uchaguzi wa Wilaya ya Nachingwea Ndugu Robert Mmari, amewataka wananchi kujitokeza mapema katika zoezi la uandikishaji ili kuepuka foleni, na kuzingatia kuwa ni muhimu kushiriki mapema ili kuepuka msongamano wa mwisho. Alisisitiza kwamba wananchi waende kwenye vituo vyao vya kupigia kura na kupeleka taarifa zao wenyewe wakati wa zoezi hilo.
Akijibu maswali kutoka kwa wachungaji Simon Njenda na Charles Mwansasu, Mmari alisema kuwa wananchi watapata taarifa za kuanza kwa zoezi hilo kupitia matangazo yatakayopita katika maeneo yote. Pia, aliongeza kuwa watu wenye ulemavu, wazee na wajawazito watapewa kipaumbele wakati wa uandikishaji.
Aidha, Mmari alisisitiza kwamba Serikali kupitia Tume Huru ya Uchaguzi imetuma wataalamu kwa ajili ya kushughulikia matatizo yanayoweza kutokea, kama vile matatizo ya mashine au mtandao wakati wa zoezi la uandikishaji.
