Imetumwa : January 17th, 2025
Mafunzo ya kuwajengea uwezo maafisa ugani kilimo walioajiriwa na Bodi ya Korosho Tanzania kupitia programu ya Jenga Kesho (Building a Better Tomorrow - BBT) yamehitimishwa leo, tarehe 17 Januari 2025. Mafunzo haya ya siku tano yalilenga kuboresha huduma za ugani kwa wakulima na kupanua wigo wa upatikanaji wa huduma bora za kilimo kupitia wahitimu wa fani ya kilimo.
Mgeni rasmi katika mafunzo hayo, Das Haji Balozi, akimuwakilisha Mkuu wa Wilaya ya Nachingwea, Mheshimiwa Hassan Moyo, aliwasisitiza maafisa ugani kuwa na uadilifu katika kutekeleza majukumu yao na kutoa huduma bora kwa wakulima. Aliweka wazi malengo ya serikali ya Awamu ya Sita ya kuongeza uzalishaji wa korosho kwa kufikia tani 700,000 mwaka 2025/2026 na tani 1,000,000 ifikapo mwaka 2029/2030. Aliipongeza Bodi ya Korosho kwa mafanikio yaliyopatikana, huku akisisitiza kuwa uzalishaji wa korosho ghafi umeongezeka kutoka tani 310,787 kwa msimu wa 2023/2024 hadi tani 410,000 kwa msimu wa 2024/2025.
Aidha, Mwenyekiti wa Runali Odas Mpunga, alitoa pongezi kwa maafisa ugani kwa juhudi zao za kuleta maendeleo katika kilimo cha korosho na kuhimiza ushirikiano zaidi kati ya wakulima na wataalamu wa ugani. Alisisitiza umuhimu wa kuwa na ushirikiano wa karibu ili kufikia malengo ya serikali katika sekta ya kilimo na kuhamasisha wakulima kuongeza uzalishaji.
Mafunzo haya yanalenga kuleta mabadiliko makubwa katika sekta ya kilimo na kusaidia wakulima kuwa na ufahamu zaidi kuhusu mbinu bora za kilimo na uzalishaji wa mazao kwa wingi. Maafisa ugani walihimizwa kutumia pikipiki na Vishikwambi kama zana muhimu za kufikia wakulima wengi zaidi na kufanikisha malengo ya taifa katika kilimo cha korosho.
