Imetumwa : January 16th, 2024
Mkuu wa Wilaya ya Nachingwea Mhe Mohamed Hassan Moyo leo January 16, 2024 amefanya zoezi la ufuatiliaji wa uripoti wa wanafunzi wa kidato cha kwanza katika baadhi ya Shule za Sekondari zilizopo jirani na makao makuu ya Wilaya hiyo. Mkuu wa Wilaya ametembelea katika shule ya Sekondari ya Nachingwea, shule ya wasichana ya Nachingwea, Sekondari ya Nambambo na Sekondari ya Amandus Chinguile.
Mhe Moyo amesema hali ya uripoti wa wanafunzi wa kidato cha kwanza bado sio nzuri kwani katika shule alizotembelea nusu ya wanafunzi wa kidato cha kwanza bado hawajaripoti, akitolea mfano Sekondari ya Nambambo ambako kati ya wanafunzi zaidi ya 320 wa kidato cha kwanza walioripoti mpaka sasa ni 185. Hivyo Mhe Moyo ametoa wito kwa viongozi wa kata, vijiji, vitongoji kufuatilia ili kujua wanafunzi wako wapi na kwani hawajaripoti.
Aidha, Mhe Moyo amesema wanafunzi wote ambao hawajaripoti shule mpaka kufikia January 19, 2024 wanatakiwa kuripoti shule. Kama ikibainika kwamba kutoripoti kwa wanafunzi hao kunasababishwa na Wazazi basi wazazi hao watachukuliwa hatua kali za kisheria.
#tupovizuri
