Imetumwa : January 28th, 2025
Leo, tarehe 28 Januari 2025, Halmashauri ya Nachingwea imefunga mtambo wa kusaga kokoto na kuvunja mawe katika Kata ya Chiumbati, hatua ambayo inatarajiwa kutatua changamoto za ucheleweshaji wa miradi kutokana na ukosefu wa kokoto na mawe. Halmashauri ilikumbana na changamoto kubwa baada ya uzalishaji wa kokoto kwa mikono kushindwa kutosheleza mahitaji ya miradi mingi.
Mkurugenzi Mtendaji wa Halmashauri ya Nachingwea, Mhandisi Chionda Kawawa, amesema kuwa mtambo huu utaweza kuzalisha kokoto za kutosha kwa mahitaji ya shule moja kwa siku mbili au tatu tu. Alishukuru Serikali kwa kutoa maelekezo bora ya matumizi ya mapato ya ndani katika kufanikisha mradi huu.
Mtambo huu unatarajiwa kuboresha utekelezaji wa miradi ya Halmashauri, kuondoa changamoto ya upatikanaji wa mawe na kokoto, na pia kutoa ajira kwa vijana. Aidha, utakuwa chanzo kingine cha mapato kwa wale watakao hitaji huduma hizo.
